Gugma sa bath house

Ah Loong: How long do you think does it take to fall in love?
Orked: A minute. How long did it take you to fall in love with me?
Ah Loong: Much less than that.

Ah Loong kag Orked, sa “Sepet”, sangka pelikula nga Malay

Sangka misuk lang

Naluyag ako sa imo haron

Nga nagapatupung

Sa dingding nga nainas run

Sa bag-id kang ginatos

ka mga ginamingaw nga likod.

Sangka kuhit lang

Ang akun panit nagsirit

Nga magdukut sa imo panit;

Ang atun mga tudlo

Nanultol sa dulum,

Lamang nga magharkanay

Ang atun mga kibul sa palad.

Sangka tikang

Paagto sa makitid nga langit

Kang atun paghingalit,

Sangka tukis

kang tualya nga nagaputos

Kang atun mga kalag,

Bisan rugya lang

Kon makahigugma kita,

Bisan kulang sa tinion.

Isipun run lang natun

Kar-on, paghalin rugya

Kon pira ka tikang

Ang masunod nga gugma.

Sa pagkaluya, kaluya.