Puti ang buhok sa tinuig nga panabon
Kang utang kag baraydan.
Ginbaligya na ang anang kaserola
Agud makapila kag makapasadya
Sa nagairigma nga may sarang
Magbutang kang bugas kag sardinas
Sa andang mga pinggan nga pingas.
Ay, pa-kiss naman Kuya Willie!
Pangabay ni misis nga bungisngis,
Nagaibok-ibok sa anang katambuk,
Nagaralabaw pa ang bulbol sa iruk.
Siyam ang andang kabataan,
Sara lang nakalapak sa eskwelahan
Kag ang iban mga klasmit na
Sa tambayan kag tong-itan.
Si mister nagapamasada lang
Pero indi bale, pabugal na pa
Basta kuno iririmaw sanda
Sa hirap at ginhawa.
Maraming salamat po Kuya Willie!
Sa anang kakunyag, hay may sanglibo
Tana nga manggad, para sa anang
Pagtambling kag pasikad-sikad,
Pagtindug sa anang mga palad.
Wara tana nagaeskwela
Hay ilo molo-molo sa pamilya
Gani sa una gid nga pamangkot:
“Kung kaldero ay pot,
Ano naman ang erpat?”
Wara na masabat, nagngisi-ngisi
Dara pangalot kang alap-apun
Na nga lubut.
Ang tanan nagahinugyaw
Nga daw mga kalag
Sa TV namun nga malus-aw,
Kag ako tana nagahiribiun
Samtang pirit nga nagakadlaw.
No comments:
Post a Comment